ប្រែសម្រួល៖ រតនា

ភ្នាក់ងារប៉ូលិស Houston កំពុងស្វែងរកស្ត្រីម្នាក់ដែលត្រូវបានគេរាយការណ៍ថាបានបាត់ខ្លួននៅពេលដែលគាត់បានឆ្លងកាត់តំបន់មួយនៅជិត Horsepen Bayou ក្បែរបឹង Clear Lake ដែលប៉ូលិសសង្ស័យថាជាកន្លែងដែលគាត់បានបាត់ខ្លួននៅម៉ោងប្រហែល 8:40ព្រឹក។ ប៉ូលិសបានកំណត់គោលដៅដែលគាត់បានឆ្លងកាត់និងបើកយុទ្ធនាការរុករកយ៉ាងសកម្ម។

ទីភ្នាក់ងារប៉ូលិសបានឲ្យដឹងថា ប៉ូលិសបានប្រទះឃើញសត្វក្រពើមួយក្បាលកំពុងតែខាំពាំសាកសពស្រ្តីរងគ្រោះដែលបានបាត់ខ្លួន។ មន្រ្តីប៉ូលិសក៏សម្រេចចិត្តបាញ់សម្លាប់វាតែម្តង ខណៈដែលវាកំពុងខាំត្របាក់លើដងខ្លួនសាកសពស្ត្រីនោះ។ ការសម្រេចចិត្តបាញ់សម្លាប់សត្វក្រពើនោះគឺដើម្បីការពារកុំឲ្យក្រពើបន្តខាំហែកសាកសពស្រ្តីរងគ្រោះឲ្យខូចខាតបន្ថែមទៀត។

ភ្នាក់ងារប៉ូលិសមិនអាចបញ្ជាក់ឲ្យបានច្បាស់លាស់នោះទេថាតើសត្វក្រពើមួយក្បាលនេះវាពិតជាបានខាំសម្លាប់ស្ត្រីនោះ ឬក៏វាប្រទះឃើញសាកសពស្រ្តីនោះហើយក៏ខាំស៊ីសាកសពរបស់គាត់បន្ទាប់ពីគាត់បានស្លាប់រួចទៅហើយនោះ។

ក្រុមអ្នកជំនាញផ្នែកវេជ្ជសាស្រ្តនឹងធ្វើកោសល្យវិច័យដើម្បីកំណត់មូលហេតុនៃការស្លាប់របស់គាត់។

ភ្នាក់ងារស៊ើបអង្កេតផ្នែកឃាតកម្មនៅទីក្រុង Houston ក៏កំពុងធ្វើការស៊ើបអង្កេតលើការស្លាប់របស់

ស្ត្រីរងគ្រោះយ៉ាងសកម្ម។

អត្តសញ្ញាណរបស់ស្រ្តីរងគ្រោះគេនៅមិនទាន់ប្រាប់ឲ្យដឹងនៅឡើយទេ ចំណែកមូលហេតុនៃការស្លាប់របស់ស្រី្តនេះក៏ស្ថិតនៅក្នុងការសង្ស័យដោយមិនច្បាស់លាស់រង់ចាំលទ្ធផលធ្វើកោសល្យវិច័យរួមជាមួយនិងរបាយការណ៏ស៊ើបអង្កេតផ្នែកឃាតកម្ម៕